Musavat.com saytı güclü haker hücumuna məruz qalır. Bu, saytın tarixində ən böyük kiberhücumdur. Saytın texniki şöbəsindən verilən məlumata görə, hücumun gücü saniyədə 9 GB-yə bərabərdir. Yəni, saniyədə sayta 900 min yalançı istifadəçi daxil olur, server bu trafiki qarşılamaqda gücsüz qalır.
Gecə saat 01 radələrində Musavat.com-un fəaliyyətində bir neçə dəqiqəlik fasilə yaranıb. Daha sonra müdafiə sistemi işə düşüb, saytın fəaliyyəti bərpa olunub.
Hücumlar bu dəqiqələrdə də davam edir. Texniki şöbədən bildirilib ki, Musavat.com-un tarixində belə irimiqyaslı hücum olmayıb.
Qeyd edək ki, Batumidə olan “Yeni Müsavat” qəzetinin baş redaktoru Rauf Arifoğlu Aİ-nin “Şərq Tərəfdaşlığı” proqramı çərçivəsində vətəndaş cəmiyyəti forumundakı erməni təxribatını ictimaiyyətə çatdıran ilk jurnalistdir. Hadisə və təxribatçıların ifşası ilə bağlı Musavat.com-dakı məlumatlar Gürcüstan, Avropa ölkələri və xüsusi ilə də Ermənistan KİV-inin gündəmindədir və təxribatı baş tutmayan ermənilər bundan çox məyusdurlar.
Mənbə: musavat.com
