Cari ilin 15-16 may tarixlərində Türkiyənin İstanbul şəhərində kiber təhlükəsizlik mövzusunda beynəlxalq konfrans keçirilib. 15 ölkənin qatıldığı beynəlxalq konfransda Azərbaycanı Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin direktoru Faiq Fərmanovun rəhbərlik etdiyi nümayəndə heyəti təmsil edib.
Tədbirin əsas təşkilatçılarından biri olan Türkiyə Informasiya Texnologiyaları və Kommunikasiya Təşkilatının sədri Tayfun Acarer çıxışı zamanı kiber təhdidlərlə mübarizədə beynəlxalq əməkdaşlığın böyük əhəmiyyət daşıdığını ifadə edib.
Tədbirdə iştirakçı ölkələrlə yanaşı, Türkiyədən də olan ictimai qurum və təşkilatlar, administratorlar və qeyri-hökumət təşkilatları bir araya gəlib. Konfransın ilk günündə “Ədliyyə İnformasiya və İstintaq”, “Mobil Təhlükəsizlik” və “Kiber təhlükəsizlikdə Standartlaşdırma” mövzularında xüsusi təqdimatlar gerçəkləşib.
Konfransın ikinci günündə isə müxtəlif ölkələri təmsil edən texniki nümayəndələr — kiber proseslərə müdaxilə qrupları (CERT ) öz bacarıqlarını və təcrübələrini nümayiş etdiriblər. Belə ki, kiber hadisələrə müdaxilə qrupları tərəfindən yazılı mesajlarda olan kiber ssenarilərə cavablar verilməsi şəklində manevrlər reallaşdırılıb. Tədbirin bu hissəsində Azərbaycandan olan nümayəndə heyəti xüsusi aktivlik göstərərək uğurlu nəticələr əldə edib. Nümayəndə heyətimiz göstərdiyi nəticələrə görə sertifikatlar və tədbirin xüsusi mükafatı ilə təltif olunub.
Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin direktoru F.Fərmanovun sözlərinə görə bu tədbir kiber təhlükəsizlikdə beynəlxalq əməkdaşlığın artırılması məqsədilə ölkəmiz üçün böyük əhəmiyyət kəsb edir.
Mənbə: cert.az
