“Kasperski Laboratoriyası” şirkətinin məlumatına görə, martda dünya poçt trafikində spamın payı 6,4 faiz azalaraq 63,5 faiz təşkil edib. Arzuolunmaz məlumatların göndərilməsinin sayı üzrə lider ölkə payı 2,5 faiz azalan və 17,3 faizə bərabər olan Rusiyadır. İkinci yerdə 13,2 faizlə (1,7 faiz artım) Tayvan qərarlaşıb. Üçüncü yeri 11 faizlik göstərici ilə Hindistan tutub.
Martda müxtəlif müəllif metodları vasitəsilə xarici dillərin öyrənilməsi təklifi ilə reklam bildirişləri geniş yayılıb. Bundan əlavə, martda poçt trafikinin əsas payını telefon rabitəsi üçün xərclərin optimallaşdırılması üzrə təkliflərlə bağlı bildirişlər təşkil edib. Belə məktubların əsas hissəsi iri və orta şirkətlərə göndərilib.
Həmçinin martda fəaliyyəti vergi yığımı ilə əlaqədar olan məşhur maliyyə təşkilatları adından zərərli qoşma fayllar da geniş yayılıb. Belə məktublar istifadəçilərə vergi orqanından ödəniş bildirişi şəklində və vergini ödəmək və ya bəyannamədə əvvəllər qeyd olunmayan xərcləri göstərmək tələbi ilə gəlib.
Daha ətraflı məlumat əldə etmək üçün istifadəçiyə əlavə olunan hesabatı açmaq və ya əlavə olunan faylda sənədin formasını doldurmaq təklif olunub. Əslində isə arxivləşdirilən fayllarda zərərli proqram, o cümlədən istifadəçilərin məxfi məlumatlarını oğurlayan və ya kompüterdə zərərli proqramları yükləyən və işə salan troyanlar mövcud olub, – “Computerworld www.osp.ru” yazır.
Mənbə: ictnews.az
