TeleStar LTD tərəfindən 2012-ci ildə iPhone, iPad qurğuları üçün hazırlanmış Call Voice Changer – IntCall – Make Funny Phone Calls proqram təminatı dələduzların əlində təhlükəli alətə çevrilə bilər. Proqram təminatını qurğuya yüklədikdən sonra edlən zənglər zamanı nömrəni ixtiyari nömrəyə dəyişmək mümkündür. Bundan əlavə proqram təminatı zəng edən şəxsin səsinin tonunu dəyişmək qabiliyyətinə malikdir. Mütəxəssislərimizin sözlərinə görə proqram təminatı vasitəsilə dələduzlar phishing əməliyyatlarını həyata keçirə bilərlər. Ən maraqlısı ondan ibarətdir ki, ölkəmizdə fəaliyyət göstərən mobil operatorlar bu tip proqramları bloklamırlar. 17 mb həcmində olan proqram Apple şirkətinə məxsus iTunes resursunda əyləncə bölməsində sərbəst yayımlanır. Güman edirik ki, yaxın zamanlardan mobil operatorlar bu tip proqramların qarşısını almaq üçün tədbirlər görəcəklər. Hələlik vətəndaşlarımızdan xahiş edirik ki, gələn zənglər barədə bir qədər diqqətli olsunlar.
